依間酒店早餐超唔得，人又多，地方細、食嘅嘢只有牛奶、煙肉、腸、蛋、乳酪各1款、果汁2款、麵包3款、麥片6款、數埋得16款不特止，仲要排隊攞至過份！食碗乳酪、飲杯咖啡算數。依度仲要住多一日，聽日食乜好呢?

第一站【賀夫堡】隔離嘅【莫札特紀念碑】，但光線不足，影人唔靚，唯有專心影像。跟住行去【賀夫堡】、【英雄廣場】，又行去【瑪麗亞特瑞莎女皇雕像】、【自然史博物館】、【國立美術館】走馬看花一輪。

就去下一站，【百水公寓-古怪屋】，整個建築運用咗巴洛克式不協調對稱，再加花草裝飾。每層樓配上不規則嘅窗，同漆上唔同顏色。由於啲花花草草不停生長，每次嚟到都唔同感覺，今次感覺係“雜亂”。我想住喺上高啲人真係慘，我嚟到依度係1000 hrs.，晨早溜溜鬼殺咁嘈，雖然加裝咗雙層玻璃，但又要成日24小時都被人望住哂，真係慘~

之後上埋【多瑙塔】行出觀景台，除遠睇百水先生另一傑作【幻彩垃圾焚化爐】，影下維也納市四周外，最滿足就係食咗有生以來最大量嘅西北風，同行咗4層旋轉樓梯至到嘅厠所。

食完西北風，就返到維也納市中心放午飯。落車位附近有個建於1130年嘅古蹟【聖魯普雷希特教堂】，教堂入面仲有羅馬墓穴，探險一流。

路經小街，發現有間蒙古餐廳個招牌啲中文字調轉哂嚟寫，令我不其然諗起細個時左手寫字嘅樂樂。同猪女走入間餐廳食pizza同pasta。pizza有樣睇，但pasta無，個餐牌仲係用德文寫，望勻都無英文，就唯有靠估，睇怕唔會變咗食雪糕啩！雖然我哋日日無時無刻都想食。結果我揀咗一個德文B?????is嘅嘢，原來係肉醬意粉。

搭半個鐘頭車去自費嘅【維也納森林】，即係地洞湖。係第二次世界大戰期間德國納粹黨用嚟研製戰機嘅地方。入面溫度全年都係8度，所以出面有毯借，我勁唔夠衫，但見啲毯污穢到爆，凍死都唔著。經過45分鐘嘅遊覽，我覺得X#@Z ！！昆明九鄉、肇慶七星岩高出好多好多班，入面又無乜古蹟，連去廁所嘅五毫子都要呃，依個行程應該唔好推介俾人囉。

之後去到遜布倫宮，真的慶幸天朗氣清，影相喇Model~

晚餐喺超咸嘅中餐。